"Bakı" Qusarın "Şahdağ" klubunu 8-2 hesabı ilə məğlub edib.

Qadın otüstü hokkeyçilər arasında keçirilən Azərbaycan çempionatında 2-ci turun oyunları keçirilib. Otüstü Hokkey Federasiyasının mərkəzi arenasında əvvəlcə “Bakı” və Qusarın “Şahdağ” klubu qarşılaşıb. Görüş “Bakı”nın 8-2 hesablı qələbəsi ilə başa çatıb. Daha sonra meydana Nizami rayonu Respublika İxtisaslaşdırılmış Olimpiya Ehtiyatları Uşaq-Gənclər İdman Məktəbinin hokkeyçiləri ilə Lənkəranın “Xəzər” klubu daxil olub. Bu dueldən də paytaxt təmsilçiləri qalib ayrılıblar. Paytaxt hokkeyçilərinin vurduğu 8 topa, cənublular 1 dəfə cavab veriblər, 8-1.

Beləliklə, iki turdan sonra maksimum nəticə göstərmiş Nizami rayonu Respublika İxtisaslaşdırılmış Olimpiya Ehtiyatları Uşaq-Gənclər İdman Məktəbinin komandası turnir cədvəlinə başçılıq edir. Aktivində 3 xalı olan “Atasport -2” və “Bakı” klubu 2-3-cü yerləri bölüşdürürlər. İki turdan sonra hələ xal qazanmamış bölgə komandaları, “Şahdağ” və “Xəzər” isə sonuncudurlar.

Yüksək dəstədə yarışan qadın otüstü hokkeyçilərin ölkə çempionatında növbəti turun oyunları mayın 10-da keçiriləcək.