Ayişə Qurbanlı, Rəqiyyə Qarayeva, Turanə Seyidi, Ramilə Yusubova, Şahanə Alməmmədova və Şəms Əhmədova ayrı-ayrı çəkilərdə bütün rəqiblərinə qalib gələrək, ölkə çempionu olublar.

Cüdo üzrə Azərbaycan çempionatının startı verilib. İlk yarış günündə ümumilikdə 9 çəki üzrə qaliblər müəyyənləşib. Qadınların mübarizəsində bütün çəkilərdə ölkə çempionlarının adları artıq məlumdur. Ayişə Qurbanlı, Rəqiyyə Qarayeva, Turanə Seyidi, Ramilə Yusubova, Şahanə Alməmmədova və Şəms Əhmədova ayrı-ayrı çəkilərdə bütün rəqiblərinə qalib gələrək, ölkə çempionu olublar.

Cüdoçu kişilərin mübarizəsində isə ilk yarış günündə qaliblər yalnız iki, 60 və 66 kiloqram çəki dərəcələrində müəyyən olunub. 60 kq-da Samir Dadaşzadə finalda İlqar Müşkiyevə qalib gələrək, ölkə çempionu adını qazanıb. 66 kq çəki dərəcəsində Tərlan Kərimov fəxri kürsünün ən yüksək pilləsinə qalxıb.

Ölkə çempionatının ilk günündə mübarizəyə qoşulmuş cüdoçular arasında bir nəfər də olsun Pekin olimpiadasının iştirakçısı olmayıb. Olimpiya oyunlarında bürünc medal qazanmış Mövlud Mirəliyev və Olimpiya çempionu Elnur Məmmədli çempionatda fəxri qonaq qismində iştirak ediblər. Hətta, çempionatın açılışında olimpiya çempionumuza söz də verilib. Elnurun budəfəki ölkə çempionatında iştirak etməməsi ilə bağlı açıqlama verib: “İndi bizim yorulmamağımız üçün, bizə istirahət veriblər ona görə də iştirak etmirik”.
Qeyd edək ki, ölkə çempionatına bu gün yekun vurulacaq. Yarışın son günündə kişilər arasında daha 5 çəki dərəcəsinin qalib və mükafatçıları müəyyənləşdiriləcək. Yarışın yekunlarına əsasən təşkil olunacaq yığma komanda, gələn ilin yanvar ayında Gürcüstanın paytaxtı Tiflisdə təşkil olunacaq Dünya Kuboku yarışlarında ölkəmizin idman şərəfini qoruyacaq.