Özbəkistan mətbuatının xəbərinə görə, mayın 27-də İtaliyanın paytaxtı Romada keçiriləcək final matçını, 2008-ci ildə Özbəkistan və Asiyanın ən yaxşı hakimi seçilən Ravşan Ermetov idarə edə bilər. Xəbərdə həmçinin, iyunun 25-də keçiriləcək Asiya Çempionlar Liqasının final matçını UEFA hakiminin idarə edə biləcəyi qeyd olunub.

Özbəkistan FutboL Federasiyasının (ÖFF) mətbuat mərkəzinə açıqlama verən Ermetov, bununla bağlı ona hələlik heç bir təklif gəlmədiyini, ancaq təklif gələcəyi təqdirdə Çempionlar Liqasının final matçını iadrə etməyə hazır olduğunu bildirib.

Həm Özbəkistan Oliy (yüksək) liqasında, həm də Asiya Çempionlar Liqasında uğurlu idarəçiliklə diqqət çəkən Ermetov, 2008-ci ildə Asiyanın ən yaxşı hakimi seçilib.

Ermetov sonuncu dəfə 2008-ci ildə Yaponiyada İngiltərənin "Mançester Yunayted" və Ekvadorun  "Liq de Quito" klubları arasında keçirilən Klublararası Dünya Çempionatının final matçını idarə edib. O, "Mançester Yunayted"in futbolçusu Nemanja Vidicə qırmızı vərəqə göstərmişdi.

Özbək hakimin idarə edəcəyi bildirilən Çempionlar Liqasının final qarşılaşmasının komandaları isə sabah keçiriləcək "Arsenal"-"Mançester Yunayted" və mayın 6-da keçiriləcək "Çelsi"-"Barselona" matçlarından sonra bəlli olacaq.